domingo, 19 de agosto de 2018

NIEVE EN EL PUERTO EN EL JOVELLANOS

Preparativos pal estrenu nel Teatru Prendes cola imaxen d´Arsenio sobre l´escenariu.

El pasáu vienres día 17 d´agostu, nel Teatru Prendes de Candás, dientro del Salón de Teatru Costumista, estrenó la Compañía Asturiana de Comedias, una nueva versión, de la obra Nieve en el Puerto d´Eladio Verde. Un fechu, aunque nun se si hestóricu, si emportante dientro de la hestoria del nuesu teatru popular. Porque foi con esta obra cola qu´Eladio Sánchez “Lalo”, recuperó la mítica y centenaria Compañía Asturiana de Comedias nel añu 1986 del pasáu sieglu. Con Pili Ibaseta, Arsenio González y Josefina García, ente otros, dieron continuidá al más tradicional y popular del nuesu teatru..

La emportancia d´esti estrenu dala el fechu de que da continuidá, otra vegada más, a la hestórica Compañía, nún momentu críticu pol fallecimientu de tres de los sos pilares fundamentales en poco más de dos años. Manuel Aller “Puloli”, Arsenio González y Lalo Sánchez. Difíciles momentos pa los miembros más veteranos del grupu y sobre too pa les actrices Josefina y Pili, viudes de Arsenio y Lalo y pa Norberto Sánchez, fiu d´esti últimu, actor de tercera xeneración, que tuvo que sobreponese al duelu y amás d´ensayar un nuevu papel,  tuvo que garrar la sierra, la escofina y la brocha pa da-y vida  a los decoraos de la nueva obra.

La función tién que continuar y polo tanto cada una de les representaciones tien  que ser un homenaxe a los ya nun tán , anque  si que siguen tando presentes nel espíritu y nel recuerdu y agradece-yos la herencia que mos dexaron.

Nieve en el puerto ye tamién una oportunidá pa ver una nueva versión fecha por Sergio Buelga, qu´actualiza, aunque respetando l´orixinal d´Eladio Verde, con apuntes que dan un toque chehovianu, como ye´l pasu´l tiempu y qu´afonden nel estilu melodramáticu de la obra.

Con un fondu dramáticu d´un triángulu amorosu, la obra sirve de pretestu pa una comedia de costumes onde los sos personaxes, delantre del chigre El Llagarón,  dirán  enfrentándose a les sos desventures personales, con unos diálogos enllenos de dinamismu y humor.

Dirixida pol propiu Sergio Buelga, la obra tá interpretada por Manuel F. Rodriguez, Josefina García, Pili Ibaseta, Mario Valdés, Armando Felgueroso, Belén Sánchez, Sergio Buelga, Marta Casas, Mar Buelga, Norberto Sánchez y Lluis Antón González.

Nieve en el puerto, podrá vese nel teatru Jovellanos de Xixón los prósimos díes 24, 25 y 26 d´agostu a partir de les 20:30 hores.

lunes, 28 de mayo de 2018

Presentación del llibru de Telón de Fondo Una maleta enllena recortes.

El prósimu día 31 de mayu, a partir de les 19 hores, fadráse la presentación del llibru de Telón de Fondo "Una maleta enllena recortes", nel Atenéu Obreru de Xixón C/Covadonga 7-1º.
Una maleta enllena recortes ye un llibru-homenaxe al más verteranu de los grupos de teatru independientes asturianos. Un recorriu gráficu, poles obres montaes pol grupu n´estos 45 años  y poles crítiques y reseñes más importentes. Un resume de la so actividá teatral, social y parateatral contaes en 110 páxines, con una guapa maquetación fecha por Samuel, d´Ediciones Trabe y portada de la pintora llanisca Helena Toraño.
La presentación fadrala el periodista y escritor Inaciu Galán, acompañau na mesa por Xulio Vigil, fundador del grupu y Lluis Antón González, autor del testu. El gran saxofonista Gimi pondrá la nota musical al actu que finará con un vinin y sidra brut asturianes,  ente los asistentes.

martes, 27 de marzo de 2018

Mensaxe del Día Mundial del Teatru.


Imaxe del misteriosu mamut de la Cueva´l Pindal de Pimiango
 
Mensaxe del Día Mundial del Teatru 2018 – Les Ameriques

Sabina Berman, México (*)

Escritora, periodista.


Podemos imaxinar.

La tribu caza páxaros tirando pequeñes piedres, cuando un enorme mamut entra de sópitu y RUXE – y coles mesmes un pequeñu humanu RUXE como´l mamut. Después toos cuerren…

Esi ruxíu de mamut pronunciáu por una muyer humana –quiero imaxinala muyer—ye l´aniciu de lo que nos fai la especie que somos. La especie capaz d´asonsañar lo que nun somos. La especie capaz de representar al Otru.

Saltemos 10 años, o 100, o mil. La tribu apendió a imitar a otros seres y representa a lo fondero de la cueva, na lluz parpaguiante de la foguera, la cacería d´esa mañana. Cuatru homes son el mamut, tres muyeres son el riu, homes y muyeres son páxaros, árboles, ñubes. Asina, la tribu atropa´l pasáu col so don pal teatru. Más asombroso: asina la tribu inventa posibles futuros: ensaya posibles formes de vencer al enemigu de la tribu, el mamut.

Los ruxios, los xiblios, los murmurios –les onomatopeyes d´esi primer teatru— volveránse llinguaxe verbal. El llinguaxe faláu va volvese llinguaxe escritu. Per otru camín, el teatru va volvese ritual y más tarde cine. Y na semilla de caúna d´estes formes seguirá tando´l teatru. La forma más senciella de representar. La forma viva de representar. El teatru, que mientres más senciellu más íntimamente nos conecta a la capacidá humana más asombrosa, la de representar al Otru.

Güei cellebramos en tolos teatros del mundu esa gloriosa capacidá humana de facer teatru. De representar, y asina prindar el nuestru pasáu pa entendelu –o d´inventar posibles futuros pa la tribu, pa ser más llibres y más felices.

Falo por supuesto de les obres de teatru que realmente importen y trescienden l´entretenimientu. Eses obres de teatru qu´importen, güei proponen lo mesmo que les más antigües: ganar a los enemigos contemporánios de la felicidá de la tribu, gracies a la capacidá de representar.

¿Cuálos son los mamuts a vencer güei nel teatru de la tribu?

Yo digo que´l mamut mayor ye la enayenación (la llocura) de los corazones humanos. La nuestra pérdiga de la capacidá de sentir colos Otros: de sentir compasión. Y la nuestra capacidá de sentir colo Otro non humano: la Ñaturaleza.

Vaya paradoxa. Güei, na oriella final del Humanismu –de la era del Antropoceno—de la era na que l´humanu ye la fuerza ñatural que mas cambió y cambia´l planeta—la misión del teatru ye contraria a la qu´axuntó a la tribu orixinalmente pa facer teatru no fondero de la cueva: güei tenemos rescatar la nuestra conexón colo ñatural.

Más que la lliteratura, más que´l cine, el teatru –que necesita la presencia d´unos seres humanos delantre d´otros seres humanos—ye maraviosamente afayaizu pa la xera de salvanos de volvenos algoritmos. Pures abstraciones.

Quitémos-y al teatru tolo que sobra. Desnudémoslu. Porque mientres más senciellu ´l teatru, más aptu pa recordanos lo único innegable: somos mientres somos nel tiempu, somos mientres somos carne y güesos y un corazón llatiendo nos nuestros pechos. Somos equí y agora solamente.

Vival´l teatru. L´arte más antigüu. L´arte más presente. L´arte más asombrosu. Viva´l teatru. Puxa´l teatru.





(*)Torna al asturianu de Lluis Antón González

sábado, 17 de marzo de 2018

45 años abriendo´l Telón.

Nesti añu 2018 cúmplense 45 años del nacimientu del grupu de teatru d´Ensidesa, Telón de Fondo. Una llarga hestoria resumía nun llibrín entituláu "Una maleta enllena recortes" http://tienda.trabe.org/as/ . Un llibru guapu illustráu por Helena Toraño y maquetáu por Samuel Castro. Dientro poco presentaráse en público.