Telón de Fondo nel Llar de Corvera.

El grupu teatru Telón de Fondo, actuará nel teatru "El Llar" de Corvera, el prósimu día 26 de septiembre, cola obra "Anton, el cantu´l cisne". La hora de comienzu será a les diez y media de la nueche.

Un cortu n´asturianu podrá vese en norteamérica.

Nel pasáu mes d´agostu acabó de grabase´l cortu "Nel Reinu" del director norteamericanu Victor Suarez. Esta película fecha n´asturianu exibiráse en versión orixinal nos Estaos Xunios, con subtítulos n´inglés. L´enfotu de Suarez (California 1989) ye mostrar nesta hestoria Asturies tal como ye. Una hestoria intimista que muestra el viaxe d´un padre cola so fia (Xulia) al intierru del güelu d´esta. Por delles razones llegen tres dies tarde al funeral. Nel trescursu de dos xornaes diremos viendo como el reencuentru col pasáu construye una hestoria inacabada enllena d´interrogantes (posiblemente cola vida mesma) na que l´espectador compondrá la suya mesma.

Esti cortu tá interpretáu polos actores asturianos Lluis Antón González, que fai de padre; Adriano Prieto, que fai d´hermanu; Mari Carmen Mendez, que fai de güela y l´actriz norteamericana Nessa Norich, que fai de fia.

"Nel Reinu" ye una coprodución astur-norteamericana na que participen el proyectu Bluelight de la Universidá de Columbia (Nueva York) y la empresa asturiana Médula Producciones.