miércoles, 5 de abril de 2023

Pegollu de la Xunta pola Defensa la Llingua.

Nel añu 1989, na so quinta edición, el grupu teatru TELÓN DE FONDO, recibió el Pegollu, pola so llabor en defensa del teatru n´asturianu. Estos premios fueron instauraos pola Xunta pola Defensa de la Llingua Asturiana, nel añu 1985, aconceyada nel llar antiguu de la Cultural Gijonesa, na cai de Marqués de San Esteban, en recuerdu al compañeru, recién fallecíu, Andrés Solar. Foi una propuesta d´Ismael Caldevilla Vega, sofitada pola mayoria de los asistentes. Tamién cuntaba con un premiu negativu "La Madreña de Purpurina", una chancia a los premios que se repartien per toa Asturies. Esti añu´l caberu Pegollu foi entregáu a la militancia de la Xunta pola Defensa de la Llingua Asturiana.

domingo, 1 de enero de 2023

50 años de teatru.

Esti añu de 2023, cúmplense 50 años del nacimientu del grupu teatru TELON DE FONDO, primero como grupu d´empresa d´ENSIDESA y depués como grupu de teatru independiente.

lunes, 31 de mayo de 2021

Xosé Bolado.

 

Queríamos vivir 

 

A la lluz escasa de los vencíos

semabes grana de cosmos en marzu.

Yo conocía

de marzu la infinitú del agua,

la fidelidá del aire a los barcos

de travesía, la blancura violeta

del Aramo... Tu,  sabíes de la muerte,

el so roce de pluma.

Los dos

queríamos vivir.  (Xosé Bolado)


N´esta odisea que ye la vida nun ye fácil atopase con persones como Xosé Bolado. Poeta, críticu lliterariu y académicu de la llingua. Una persona culta, educada y elegante, cola que percorrí (percorrimos toa una xeneración del asturianismu) una bona etapa de la vida. La transición, esa estaya na que xentes como Bolado tiraben del carru de la democracia y les llibertaes, demientres otros echaben la galga pa nun avanzar, él púnxose a militar nos movimientos sociales y de vanguardia, dende la so posición de persona culta. Los sos estudios sobre Rosario Acuña son una muestra. La difusión de la obra de la llibrepensadora feminista y la so xenerosidá al donar a la ciudá de Xixón, el fondu priváu más completu d´ella ye un bon exemplu.

El Atenéu Obreru de Xixón, que presidió dellos años, llogró una gran importancia na actividá cultural de la ciudá. La docencia na que tresmitió, a munchos de los sos alumnos, el so amor pola lliteratura. La Xunta pola Defensa de la Llingua Asturiana, El Movimientu Comunista d´Asturies, Lliberación, Pinón Folixa… fueron otros foros nos que la so militancia aportaben un saber tar únicu, el d´un auténticu gentleman.

La memoria y l´escaezu, que la nuesa mente va esbillando misteriosamente, fai que dalgunes coses queden y otres non. Tres son los momentos, que meyor recuerdo agora de Bolado y nos tres que tengo que tar eternamente agradeciu de la so xenerosidá.

Portada fecha por Jorge Fernández pal llibru Antoloxia poética del resurdimientu de Xosé Bolado.
 El primeru por escoyeme pa un recital poéticu, na presentación d´un llibru importante de la nuesa llieratura, la ANTOLOXIA POÉTICA DEL RESURDIMIENTU (1989). Un llibru fundamental p´averase a la nueva llieratura asturiana, una escoyeta fecha con procuru de los meyores poemes del momentu.

Cursos de Branu en Cangas del Narcea 1999, con Esher García y Xosé Bolado.

 El segundu, el cursu de Teatru Asturianu, dirixíu por Bolado, fechu en Cangas del Narcea, dientro de los Cursos de Branu de L´Academia de la Llingua Asturiana. Anque nun recuerde l´añu, sí m´alcuerdo que coincidió con un eclipse total de sol, asina que tuvo que ser nel añu 1999. Fueron unes xornaes de les que guardo mui bon aquel. Los cafetinos asosegaos del tapecer braniegu con Ana Cano, Esther García... y Bolado.

El terceru, aunque nun ten organizaos cronolóxicamente, ye d´avientu de 1986. Foi nel I SEMINARIU DE TEATRU EN LLINGUA ASTURIANA, entamáu pol Institutu del Teatru y les Artes Escéniques, que tocóme coordinar, baxo la direición de Santiago Sueiras. Miguel Ramos Corrada, Xuán Xosé Sánchez Vicente, Jesús Menéndez Peláez y Xosé Bolado fueron los ponentes d´aquel eventu, participando tamién el entós Direutor de la Oficina de Política Llingüistica, Faustino Álvarez Álvarez. La ponencia de Bolado entitulábase “Teatru y llingua”. N´ella facía delles consideraciones so la nuesa historia tearal. “Un fechu teatral en llingua asturiana, güei, de cumal importancia, ye La confesión de Bernardo Santareno. El testu foi tornáu y adaptáu del portugués por Carlos Rubiera y el Grupu Teatru Telón de Fondo púsolu n´escena la nuechi del 12 de mayu, nel Teatru Xovellanos de Xixón” , dicía Bolado na so ponencia. “ El drama paez concebíu, no fondero, como un intentu d´atropar – a través de los sinos – el fuxible universu la conciencia, colos sos pantasmes, mitos, etc., y la so proyeición na práctica humana. Les categories home-muyer y los sos condicionamientos ideolóxicos per un llau, per otru la esistencia llibre del deseu”….“Tal paez que teatru asturianu y chabacanería dexó de ser sinónimu, agora na llingua asturiana hai daqué no que sofitase”. Estes pallabres fueron les primeres que definieron como naide el nuesu apueste por crear un nuevu teatru asturianu. A él debemos, como grupu teatru Telón de Fondo, espresar el nuesu más fonderu homenaxe de agradecimientu. Xixón y Asturies, al traviés de les sos instituciones, pienso que tamién debien facelo.

Lluis Antón González.

 

miércoles, 1 de enero de 2020

FELIZ AÑU 2020

Feliz añu 2020. Cuarenta y siete de Telón de Fondo. A los nuesos seguidores y amigos un fuerte abrazu y bona suerte pal añu qu´entama.

domingo, 30 de diciembre de 2018

FELIZ AÑU NUEVU 2019


Feliz añu nuevu 2019, cuarenta y seis de Telón de Fondo, pa tolos nuesos seguidores. Un fuerte abrazu.

domingo, 19 de agosto de 2018

NIEVE EN EL PUERTO EN EL JOVELLANOS

Preparativos pal estrenu nel Teatru Prendes cola imaxen d´Arsenio sobre l´escenariu.

El pasáu vienres día 17 d´agostu, nel Teatru Prendes de Candás, dientro del Salón de Teatru Costumista, estrenó la Compañía Asturiana de Comedias, una nueva versión, de la obra Nieve en el Puerto d´Eladio Verde. Un fechu, aunque nun se si hestóricu, si emportante dientro de la hestoria del nuesu teatru popular. Porque foi con esta obra cola qu´Eladio Sánchez “Lalo”, recuperó la mítica y centenaria Compañía Asturiana de Comedias nel añu 1986 del pasáu sieglu. Con Pili Ibaseta, Arsenio González y Josefina García, ente otros, dieron continuidá al más tradicional y popular del nuesu teatru..

La emportancia d´esti estrenu dala el fechu de que da continuidá, otra vegada más, a la hestórica Compañía, nún momentu críticu pol fallecimientu de tres de los sos pilares fundamentales en poco más de dos años. Manuel Aller “Puloli”, Arsenio González y Lalo Sánchez. Difíciles momentos pa los miembros más veteranos del grupu y sobre too pa les actrices Josefina y Pili, viudes de Arsenio y Lalo y pa Norberto Sánchez, fiu d´esti últimu, actor de tercera xeneración, que tuvo que sobreponese al duelu y amás d´ensayar un nuevu papel,  tuvo que garrar la sierra, la escofina y la brocha pa da-y vida  a los decoraos de la nueva obra.

La función tién que continuar y polo tanto cada una de les representaciones tien  que ser un homenaxe a los ya nun tán , anque  si que siguen tando presentes nel espíritu y nel recuerdu y agradece-yos la herencia que mos dexaron.

Nieve en el puerto ye tamién una oportunidá pa ver una nueva versión fecha por Sergio Buelga, qu´actualiza, aunque respetando l´orixinal d´Eladio Verde, con apuntes que dan un toque chehovianu, como ye´l pasu´l tiempu y qu´afonden nel estilu melodramáticu de la obra.

Con un fondu dramáticu d´un triángulu amorosu, la obra sirve de pretestu pa una comedia de costumes onde los sos personaxes, delantre del chigre El Llagarón,  dirán  enfrentándose a les sos desventures personales, con unos diálogos enllenos de dinamismu y humor.

Dirixida pol propiu Sergio Buelga, la obra tá interpretada por Manuel F. Rodriguez, Josefina García, Pili Ibaseta, Mario Valdés, Armando Felgueroso, Belén Sánchez, Sergio Buelga, Marta Casas, Mar Buelga, Norberto Sánchez y Lluis Antón González.

Nieve en el puerto, podrá vese nel teatru Jovellanos de Xixón los prósimos díes 24, 25 y 26 d´agostu a partir de les 20:30 hores.

lunes, 28 de mayo de 2018

Presentación del llibru de Telón de Fondo Una maleta enllena recortes.

El prósimu día 31 de mayu, a partir de les 19 hores, fadráse la presentación del llibru de Telón de Fondo "Una maleta enllena recortes", nel Atenéu Obreru de Xixón C/Covadonga 7-1º.
Una maleta enllena recortes ye un llibru-homenaxe al más verteranu de los grupos de teatru independientes asturianos. Un recorriu gráficu, poles obres montaes pol grupu n´estos 45 años  y poles crítiques y reseñes más importentes. Un resume de la so actividá teatral, social y parateatral contaes en 110 páxines, con una guapa maquetación fecha por Samuel, d´Ediciones Trabe y portada de la pintora llanisca Helena Toraño.
La presentación fadrala el periodista y escritor Inaciu Galán, acompañau na mesa por Xulio Vigil, fundador del grupu y Lluis Antón González, autor del testu. El gran saxofonista Gimi pondrá la nota musical al actu que finará con un vinin y sidra brut asturianes,  ente los asistentes.