martes, 9 de diciembre de 2014

Telón con "El tíu Antonín" en Morea.

El prósimu día 11 de avientu, el grupu teatru TELON DE FONDO actuará nel teatru Cine Carmen de Morea, cola obra El tíu Antonín, de Lluis Antón González, basada nel Tíu Vanya d´Antón Chéjov. La obre trescurre nel interior d´una casona asturiana, a primeros del sieglu XX, una época de grandes tresformaciones. Na casona, na que viven el tíu Antonín con so má y la so sobrina Sonia, recibe la visita del matrimoniu Arboleya, compuestu por un vieyu profesor y la so muyer Helena, muncho más moza qu´él. La vida tranquila y aburria del campu, vese alteriada por esta visita y provocará un conflictu d´intereses. Despertará les pasiones de los sos habitantes, que xunto al médicu de la familia, conformarán una hestoria d´amores cruciaos. La obra tá interpretada por Ángel Héctor Sánchez, nel papel de Tíu Antonín; Marilú Casas, como Helena; Carmen Suárez  Trapiello, como Sonia; José Luis Fernández, como Profesor Arboleya y Lluis Antón González como Doctor Lluna. La dirección ye de Sara GR, la producción de Xulio Vigil y el diseñu de les lluces de Alberto Ortíz.
La hora comienzu va ser a les 8 la tarde y la entrada ye llibre.

martes, 18 de noviembre de 2014

Telón con Squash en Muñás d´Abaxu.

Telón de Fondo actuará cola obra Squash na localidá valdesana de Muñas d´Abaxu, nel local de La Cooperativa.
La obra escrita por Ernesto Caballero, hai más de 20 años, ye de una gran actualidá, pues muestra una de les cares más crueles de la crisi actual. Nuna pista de squash, dos muyeres esperen pa facer unes prebes pa un puestu de trabayu. Una comedia social con un toque de reality show". L´espectáculu ta dirxíu por Sara G.R., y interpretáu por Carmen Suárez Trapiello, Marilú Casas y Lluis Antón González, con escenografía de Beni García y lluces de Alberto Ortíz. La producción ye de Xulio Vigil. La hora comienzu va ser a les 9:30 de la tarde nueche y la entrada ye llibre.

miércoles, 5 de noviembre de 2014

Telón de Fondo en el Llar de Corvera

El grupu teatru TELON DE FONDO representará la obra El tíu Antonín, nel teatru El Llar,
de Les Vegues (Corvera) el prósimu vienres 7 de payares. Aunque basada nel Tíu Vania d´Antón Chéjov, la obra cuenta una hestoria muncho más cercana, situada na Asturies de primeros del sieglu XX, na que los cambios sociales que s´albidren, tienen nel micromundu d´una casona asturiana, una muestra de lo que pasa fuera, con unos personaxes que lluchen por cambiar y algamar un mundu meyor. La obra dirixida por Sara G.R., tá interpretada por Ángel Héctor Sánchez, nel papel de Tíu Antonín; Marilú Casas como Helena; Carmen Suarez Trapiello como Sonia; José Luis Fernández como Profesor Arboleya; y Lluis Antón González como Doctor Lluna. Completen el equipu Albero Ortíz nel diseñu de lluces y Xulio Vigil na producción.
La hora comienzu será les 22:30 y la entrada ye gratuita hasta completar aforu.

jueves, 23 de octubre de 2014

El tíu Antonín nel Valey de Piedras Blancas



El prósimu 31 d´ochobre, a partir de les 8 la tarde, el grupu teatru Telón de Fondo, actuará nel teatru del Centru Cultural Valey de Piedras Blancas (Castrillón) cola obra El tíu Antonín de Lluis Antón González, basada nel Tíu Vania d´Antón P. Chéjov.
La escena trescurre nel interior d´una casona asturiana, nún veranu a primeros del sieglu XX, onde vive el tíu Antonín, con so ma y la so sobrina Sonia. Son años de cambios de conflictos, d´una socidá rural en plena tresformación hacia una más industrial. Esos conflictos esternos sirven de telón de fondu, a los internos de la casa, producios pola llegada del matrimoniu Arboleya. La tormenta entamada pol conflictu d´intereses, polos amores cruciaos, por una realidá que s´opon al deséu de cambiu d´unos personaxes que tan atrapaos nos sos propios destinos.
La obra tá dirixía por Sara G.R. con Ángel Héctor Sánchez, como Tíu Antonín; Marilú Casas como Helena, José Luis Fernández nel papel de Profesor Arboleya; Carmen Suárez Trapiello, como Sonia y Lluis Antón González que fai de Doctor Lluna.
La produción ye de Xulio Vigil y le lluces de Alberto Ortíz.  

miércoles, 7 de mayo de 2014

Telón en Sotrondio con El tíu Antonín.

El grupu teatru Telón de Fondo actuará, el prósimu sábadu día 10 de mayu, nel Centru Social (antigua Plaza d´Abastos) de Sotrondio, cola obra El tíu Antonín de Lluis Antón González, basada en El tíu Vania d´Antón Chéjov.
La obra tá interpretada, nesta ocasión, por Sara García Rodriguez nel papel d´Helena; José Luis Fernández qu´interpreta al Profesor Arboleya; Carmen Suárez Trapiello que fai de Sonia; Ángel Héctor nel papel del Tiu Antonín y Lluis Antón González como Doctor Manuel Lluna.
La obra tá dirixida por Sara G.R., les lluces son de Alberto Ortíz y la producción de Xulio Vigil.
El tíu Antonín ye una hestoria que trescurre n´Asturies, nos años 30 del pasáu sieglu, una época de grandes cambios sociales, durante un veranu y nel interior d´una casona asturiana. El conflictu d´intereses y los amores cruciaos faen que se desate una tormenta nel interior de la casa y que por momentos apunta  la traxedia.
La hora comienzu será les ocho la tarde y la entrada ye llibre hasta completar aforu.

miércoles, 23 de abril de 2014

Cambiu de local del grupu Telón de Fondo.



Nel añu 1999, pasamos d´un pequeñu local de la cai Camín de Rubín nel barriu de La Calzada a otru mayor na cai Julio, del barriu de El Llano. Agora la crisi, oblíganos a buscar y a resituanos n´otru más económicu.
En El Llano, montáronse les obres “Una hora ensín televisión”, de Jaime Salom; “L´Ensalmador”, d´Antón de Marirreguera; “Antón. El cantu´l cisne”, de Lluis Antón González; “El xuegu de Yalta” de Brian Friel; “Squash” d´Ernesto Caballero y “El tíu Antonín”, de Lluis Antón González basada en “El tíu Vania”.
Per esti local pasaron una montonera de persones, ente actores, directores, técnicos y amantes toos ellos del teatru asturianu. Xuán Coll, Carmen Gloria García, Quique Iglesias, Xosé Monteserín, Isabel Friera, José Luis Fernández, Xulio Vigil, Benigno García Bueno, Alberto Ortíz, Carmen Suárez Trapiello, Sara García Rodriguez, Marilú Casas, Claudio Vereterra, Ángel Héctor Sánchez, Lluis Antón González….
Almacén, local d´ensayos, estudíu fotográficu, improvisáu plató pa la grabación de programes de tv y videoclips foron dalgunos de los usos d´estos caberos quince años.
Agora poco depués de cumplir 40 años na escena asturiana, el grupu teatru Telón de Fondo, entama nel Nuevu Xixón, nun local más afayaizu, y acordies coles nuestres posibilidaes económiques, un proyeutu de futuru, con menos llastre, y renovaes illusiones, continuando, como siempre, la defensa y normalización del teatru n´asturianu.

sábado, 15 de febrero de 2014

TELÓN DE FONDO EN A VEIGA.

El grupu teatru TELÓN DE FONDO actuará esti domingu 16 nos "XVII Encuentros Teatrales IES Elisa y Luís Villamil", cola obra El tíu Antonín de Lluis Antón González, basada en El tíu Vania d´Antón Chéjov. La abra trescurre en veranu  nuna casona asturiana, a primeros del sieglu XX. Una hestoria d´amores cruzaos, onde la vida aparentemente aburria, nun impide deséu intensu y les pasiones,
de los sos protagonistes, que ven como la vida pasa, ensín llograr nengún momentu algamar los sos suaños.
La obra tá protagonizada por Ángel Héctor Sánchez, como´l Tíu Antonín; Marilú Casas, como Helena; Carmen Suárez Trapiello, como Sonia; José Luis Fernández, como el Profesor Arboleya y Lluis Antón González, como´l Doctor Lluna. La dirección ye de Sara G.R., les lluces de Alberto Ortiz y la produción de Xulio Vigil.
La hora comienzu será a les seis de la tarde na Casa de la Cultura de A Veiga.

domingo, 9 de febrero de 2014

LA RISIÓN




La Risión foi una seición selmanal de monólogos, que formaba parte del programa Al Aldu de la TPA. Foi un programa modestu, que pretendía, ente otres coses, revitalizar el monólogu asturianu y que s´emitía en horariu matinal.

El monólogu cunta con una llarga tradición n´Asturies y algamó gran popularidá nos años sesenta y setenta del pasáu sieglu, gracies a la difusión que supunso, en primer llugar la so grabación en discos de vinilo, y lluego en cintes cassettes, que permitien por primer vez lo que güei nomamos “copia pirata”, anque en menor media, pos l´esfuerzu y coste de la copia analóxica yera mayor que lo ye la dixital. Pandiella, foi nesa época´l más popular de los monologuistes, qu´actuaben en fiestas y romeries, casi siempre acompañaos pola canción asturiana.
Cola llegada de la democracia, les nueves corrientes creatives y revindicatives de la lliteratura asturiana (El Surdimientu), non solo nun cultiven esti xéneru, sinon que refuguen dél, pola so significancia consevadora, y por rellacionar a l´asturianu solo col humor y con colos estereotipos de monologuista borrachu, machista, escatolóxicu…
Sólo Rubén Sánchez  Vicente, nos años 80, y depués Dolfu Camilo nos 90, acercaríense a esti xéneru pa tratar de revitalizálu y actualizálu, manteniendo´l versu del monólogu tradicional.
Antón García, foi´l primer editor, a primeros d´esti sieglu, qu´apostó fuerte pola edición de monólogos asturianos cola coleición “Maestros del humor”, con una guapa edicción en tapa dura. Trató superar la barrera, que suponia la publicación n´asturianu, arrequexada na llibreria, y buscó un públicu más ampliu y popular, faciendo una distribución importante nos kioscos de prensa d´Asturies.
Nel 2005 Inaciu Galán, cola asociación H.a Xareos, entama na sala Albeniz de Xixón el I Certame de Monólogu Modernu cola pretensión de modernizar el monólogu asturianu, con nuevos textos que ya nun son, n´esta ocasión, necesariamente en versu. Esto xenera un pequeñu alderique, ente la corriente tradicional del monólogu asturianu y el monólogu modernu más averáu al “stand-up comedy”.
Nel 2007, encárgame Antón García, la coordinación de la seición de monólgos La Risión del programa Al Aldu, que va emitise dientro del magazine matinal “Con dos de azucar”. La mio llabor de coordinación, ye n´esti momentu, la de buscar textos y actores intérpretes pa poder grabar un monólogu nuevu cada selmana.

Los autores
Dende xunu de 2007 avientu de 2009, que coordine esti programa emitiéronse 141 monologos diferentes, la mayoria, hasta esi momentu, inéditos y escritos a costa fecha pal programa, de los cuales el 38 % foron escritos por muyeres, lo que representa un cambiu importante nesti xéneru mayoritariamente masculín. Cristina Muñiz foi, con 43  l´autora con más monólogos emitios, seguia por Carlos Alba (32), Tante Blanco (21), Luzdivino Diaz González (12) y Vanessa Peña (9). Grabáronse tamién monólogos clásicos d´autores como León Delestal, Anxelu, Rubén Sánchez o Pin el Cuetu. Autores asturianos d´otros xéneros como José Luis Piquero, Inaciu Galán, Sixto Cortina, Alberto Suarez, Chechu García… tamién escribieron dalgunos de los monólogos. Tamién, por primer vez, emitiéronse monólogos en gallego-asturiano.

Los actores monologuistes
Los actores  monologuistes que participaron nestos dos años y mediu foron 23, de los que´l 48 % foron muyeres, anque la presencia masculina foi mayor pol númberu de monólogos grabaos, la presencia femenina tamién representa un saltu cuantitativu. Carlos Alba (33), Tante Blanco (21), Silvino Torre (17) foron los que más participaron. Amás de los actores ya especializaos en monólogu asturianu como Carlos Alba Cellero, Pin de la Cotolla, El Maestru, Luz Mari del Sol o Min de les Pieces, incorporáronse un bon númberu d´actores de la escena asturiana como Silvino Torre, Begoña Quirós, Carmen Sandoval, Isabel Friera, Izar Gayo, Carmen Gloria García, José Maria Prieto, Marilú Casas, Martina Bueno, Sara García, Toño Caamaño, Xuán Coll….

Audiencia
Anque estos datos son poco fiables (sonlo en xeneral tolos datos que TNS da p´Asturies, polos pocos audímetros  que tien) na banda de pola mañana sonlo entá más, pola poca audiencia en xeneral de les televisiones. Tamién la curtia duración del programa (diez minutos) ye un datu que xuega a la contra pa poder dar una valoración  más esauta. Estos datos son recoyios de Fórmula TV nel primer trimestre de 2009, dannos una muestra de la volatilidá de los datos que van dende´l 13 al 0 % d´audiencia. Asina fice´l paletu (13,00 %), Viaxes llargos (10,00 %), Tópicos asturianos (7,70 %) Animador sociocultural (7,40 %), Xuegos traumáticos (7,20 %), Test ¿mozu o carroza? (7,00 %) foron los monólogos qu´algamaron les principales cuotes de pantalla. El total del promediu, nel horariu matinal (del que disponemos datos) foi de 3087 espectadores por programa y un 4,42 % d´audiencia, la cual pienso que nun fuera mui diferente al restu de los programes de la cadena nesa banda horaria.
Dalgunos de los monólogos foron colgaos en You Tube y la so popularidá como tolo d´internet, tien poco que ver, en dellos casos, cola calidá, pero nun dexa de ser un datu más de la visibilidá del programa. “Ser asturianu”, monólogu de Cristina Muñiz ya interpretáu por Silvino Torre con más de 46000 visites, 25 comentarios, y 79 valoraciones yel más popular de toos, seguiu por “Independencia” de Cristina Muñiz ya interpretáu por Begoña Quirós, con cuasi 20000 visites, 66 valoraciones y 20 comentarios. El promediu de los monólogos colgaos ye de  de unes 9000 visites con una valoración media de 4,8 sobre 5.

Difusión
El programa revitalizó la edicción de monólogos asturianos, qu´amás de los ya editaos previamente de “Cotollaes” de Luzdivino Diaz González (Pin de la Cotolla) y “Del chigre” de Carlos Alba (Cellero), editáronse tres nuevos llibros , “Que vos preste” de Cristina Muñiz, “Pa echar unes rises”, de varios autores y “Otros monólogos pa echar unes rises”, tamién de varios autores.
A cuenta del programa na tv, creóse un pequeñu circuitu alternativu de monólogos en chigres y cafeteries, que la crisi eliminó cuasi por completo. Candás, Xixón, Llugones, Avilés, La Corredoria, La Pola L.lena, La Felguera… foron dalgunos de los sitios nos que llogróse llevar estes actuaciones.

Pa finar, pienso que seria bono, un mayor apoyu, dende les instituciones, al monólogu asturianu, formando nuevos monologuistes (na ESAD o otres escueles municipales) y creando nuevos concursos, como el Pepe Campo de  Morea.  Difusión na TPA, nun horariu más afayaizu, a ser posible grabáu con públicu y con una total llibertá de los creadores, un programa de monólogos, monográficu o formando parte d´otru más variáu, pero sobre too, el reconocimientu del monologuista, como ún de elementos fundamentales del nuestru teatru popular.

Lluis Antón González.