NOTICIES DE TELON (Breve hestoria d´un grupu)

Nel añu 1973 créase´l grupu de teatru Telón de Fondo, como grupu d´empresa de l´antigua ENSIDESA de Xixón. En ENSIDESA Avilés ya venia funcionando el grupu “Candilejas”, capitaneáu por Beni García. Xabel Hevia, Xuán Coll, Xulio Vigil, Rosabel Berrocal, Nel del Solo y Joaquín Fuertes, son dellos de los fundadores del grupu.

1973 ye un añu de cambios. El réxime tá dando les últimes boquiaes, la pequeña apertura, el turismu y la influyencia europea, albidren cambios culturales y modos de vida nuevos. 1973 ye l´añu del golpe d´estáu en Chile, que frañaria les esperances d´un nuevu socialismu entamáu por Salvador Allende. Tamién ye l´añu nel que El Tarangu disputa el Tour de Francia a Ocaña, Quini trunfa nel Sporting, quedando esa temporada Pichichi de Primera División y Vitor Manuel y Ana Belén entamen un nuevu camín xuntos.

Los cambios de los primeros años de los 70, llévense tamién por delantre toles señes d´identidá asturianes, que´l nuevu progresismu considera conservadores y atrasaes. La gaita, la sidra, la tonada, la llingua… sufren el arrollador envite de les nueves modes, que tienen, nos modernos medios de comunicación, sobre too la televisión, que poco a poco va penetrando en tolos llares, los sos aliaos.

El teatru n´Asturies, aparte de les representaciones que faen les compañies madrileñes, ye totalmente amateur, y faise en castellán, (si quitamos les populares representaciones costumistes) y que tienen como únicu fin unise al movimientu contestatariu, representando obres d´autores non representaos pol teatru profesional o mediu prohibies. Eso fai qu´actores, como l´asturianu Juán José Otegui, que d´aquella trunfaba en Madrid, nun-y preste el teatru que representa. El 73 tamién ye l´añu que l´actor d´orixe asturianu, Germán Robles, nietu del escritor Pachín de Melás, trunfa en México.

Les primeres obres del grupu, siguen la corriente de los grupos independientes, representando obres menos comerciales, que tienen que pasar pol filtru de la censura pa poder ser representaes. Escorial y Cristóbal Colón de autor belga Michel de Ghelderode (1973 y 1974) y “Conduciré a mi pueblo a través del desierto” del italianu Mario Papadía. Tamién representarien obres de teatru infantil como “El león enamorado” o “Asamblea general” de Lauro Olmo y Pilar Enciso.

En 1977 móntense dos obres, “El siglo de oro” sobre autores clásicos españoles y “El triquimundiu”, sobre autores asturianos y marca ya una dixebra ente les dos tendencies del grupu, que acabará col trunfu de les tesis asturianistes, defendies, fundamentalmente, por Xabel Hevia, Xulio Vigil, Santiago Alcaraz y Xuán Coll. Esto tamién ye tamién debío a que en 1974, tres profesores asturianos, Xuán Xosé Sanchez Vicente, Xosé Lluis García Arias y Lluis Xabel, revindiquen nes fueyes de la revista “Asturias Semanal”, al asturianu como una llingua de cultura. Esto propiciaría nel añu 76 la creación de l´asociación Conceyu Bable y una nueva xeneración d´escritores, nomada depués, del Surdimientu, que faen del asturianu una llingua de creación, más pallá de los usos poéticos y humorísticos y festivos, nos que taba arequexada la llingua asturiana nos caberos años. Dalgunos de los miembros del grupu, como Xuán Coll, Xulio Vigil o Xabel Hevia, avérense a esti movimientu.

En 1978, el grupu monta “El más extraño idilio” de Tennessee Willians. Con Lola Junquera, Xulio Vigil, Nel del Solo, Jaime Aguilar y Tere Navarro.

En 1980, la compañía, nun esfuerzu de normalizar el teatru asturianu, más pallá del costumismu, pero ensín romper con él, monta la obra “Garulla (xaréu traxicómicu d´Antón y Mariyina)”. Una obra de creación colectiva, na que s´axunten testos costumistes, como son “Les tres chaquetes d´Anxelu” cola “La rosa de papel” de Ramón Maria del Valle Inclán. La representación d´esta obra nel Entoldáu de la Plaza Mayor de Ayuntamiento Xixón, con una vaca n´escena, La Coronela, foi una de les más célebres representaciones del grupu. Taba interpretada, ente otros, por Zoila, Yolanda, Xulio Vigil, Nel del Solo, y Rosabel Berrocal. “Garulla”, con más de cien funciones, ye la obra más representada pola compañía hasta la fecha.

A primeros de los 80, l´amistá de dellos miembros del grupu con Julio Castronuovo Suárez (Arxentina 1932 - Madrid 2013) profesor de mimo y pantomima de la RESAD de Madrid, y con ascendencia asturiana, marcará una nueva etapa del grupu.

Julio Castronuovo

La so obra “Miel, pastel y un muñecu de papel”, con canciones, mimo, pantomima y títeres, será una de les referentes del teatru infantil asturianu durante años. Joaquín Fuertes decia en El Comercio: “Creemos que este grupo ha dado un paso importante con esta obra para niños y mayores”.

En 1983, el profesor arxentinu, dirixe una una adaptación de la farsa de maese Pathelin, una obra anónima francesa del sieglu XV, que cuenta la historia d´un abogáu veniu a menos, y de les trampes que fai , pa volver a algamar la so posición social. La obra taba protagonizada por Nel del Solo, nel papel d´Abogáu, Xuán Coll, el de Pañeru, Rosabel Berrocal de Guillerma y Xuez, y Mari Mar Cuesta como Pastorín. La torna al asturianu, non exenta de polémica, foi fecha por Nel Anxelu Zapico, y será la primer obra, d´una llingua estranxera, representada n´asturianu, en “Bable académicu” como diría el diariu madrileñu “El País”.

En 1986 estrénase la obra “La confesión” del autor portugués Bernardo Santareno, y versión n´asturianu de Carlos Rubiera. Esta obra propuesta por Castronuovo y que de primeres diba dirixir él, foi finalmente dirixida por Rosabel Berrocal, pos l´arxentinu ya consideraba que´l grupu tenia formación de sobra pa dirixir los sos propios montaxes. “La confesión” ye una hestoria que trescurre en plena Revolución de los Claveles de Portugal, que´l grupu traslada a la Transición asturiana y nella descubrimos la reacción d´un cura preconciliar a la confesión de tres personaxes, un ama de casa maltratada, un travesti que busca la so identidá y una señora de clase alta. La obra tá protagonizada por Xuán Coll, nel papel de Cura; Rosabel Berrocal nel d´Ama de casa y Señora y Lluis Antón González nel del Travesti Françoise.

“La confesión” será la obra, hasta la fecha, que meyores crítiques consiguió, foi recomendada en su dia pola Guia del Ociu de Madrid. José Moleón nel Diario 16 decía “La compañía asturiana ha encarado el texto con una plausible dignidad formal. Se sostienen los personajes, el ritmo y las situaciones , y el público no se aburre nunca”. La revista madrileña Reseña, de lliteratura, arte y espectáculos nuna crítica firmada por Lucas López decia: “La puesta en escena de la obra de Santareno, por parte de Telón de Fondo ha de calificarse con muy buena nota… Aplauso. El bable no presenta problemas, la historia si.”. Felix Caicoya nel diariu La Nueva España con motivu de la representación del ciclu “Mujeres a Escena” decía: “Muy bien la escenografía ya la dirección de actores, de tono naturalista, sin recargas ni amaneramientos innecesarios”. Xosé Bolado na revista Teatro escribía: “Un fechu teatral en llingua asturiana, güei, de cumal importancia, ye La Confesión de Bernardo Santareno… Tal paez que teatru asturianu y chabacanería dexó de ser sinónimu, agora na llingua asturiana hai daqué no que sofitase”. “La Confesión” tamién ye la obra la más internacional del grupu, aparte de tár una selmana en cartel en Madrid, foi representada n´asturianu en Lieja, Bruseles y Lisboa.

En 1987, Rosabel Berrocal, escribe y dirixe la obra infantil, “D´animales, bancos y lladrones” que se representa tanto n´escenarios como na cai. Nel repartu tán los actores del grupu, Xuán Coll, Xulio Vigil, Lluis Antón González y Rosabel Berrocal, cola collaboración de miembros del grupu La Gotera, como Toño Criado, Martina Bueno, Luis Alberto Gutierrez y Claudio Vereterra.

En 1988, Ramón d´Andrés fai la torna de la obra “Mayestrix escontra Cuasimodo” del autor belga Frèderic Latin. Ye una obra, aunque principalmente va dirixida al públicu infantil, pué decise que ye pa tolos públicos. Nella los personaxes revélense contra´l so propiu autor, pretendiendo ellos escribir la so propia hestoria. El repartu componénlu Xuán Coll, nel papel de Mayestrix, Rosabel Berrocal, nel papel de la Condesa Lenoska, Lluis Antón González nel de Cuasimodo y Manuel Altares nel de Autor. Completaben l´espectáculu, Toño Criado y Buznego. La obra foi respresentada con bona acoyida na feria de FETEN del añu 1991.

En 1989, el grupu da un pasu más nel terrén normalizador, representando la obra d´Eduard Albee “Hestoria del zoo”, con versión n´asturianu del escritor Carlos Rubiera. Esta obra situa l´acción nel “Central Park” de Nueva York, y trata de la incomunicación de la socidá moderna, con un llinguaxe por momentos absurdu y poéticu notros va conduciendo a los sos dos personaxes a un conflictu non deseáu. La obra, tá dirixida por Rosabel Berrocal, con escenografia y lluces de Beni García Bueno tá interpretada por Manuel Altares nel papel de Jerry y Lluis Antón González nel de Peter.

En 1992 estrénase la obra “Squash” del autor Ernesto Caballero, actual director del Centru Dramáticu Nacional, qu´asisterá al estrenu nel teatru Xovellanos de Xixón y quedará encantáu d´esta versión en llingua asturiana. Squash ye una comedia social, na que se denuncia l´abusu y la risión, que n´ocasiones provoquen les prebes pa llograr un trabayu. Dirixida por Rosabel Berrocal, con escenografía y lluces de Beni García Bueno y interpretada por Patricia Rey, nel papel de Piedá, Pili Orellana nel de Trini y Lluis Antón González nel de Ladio.

En 1995, estrénase la obra del que depués seria premiu Nobel, Dario Fo, “Equí nun paga nadie”. Una comedia social, d´enquívocos, d´entraes y salides, onde los protagonistes, xente d´un barriu obreru, lluchen contra los abusos del poder, la especulación de los precios y los sindicatos aburguesaos. La obra tá dirixida por Rosabel Berrocal, con escenografía y diseñu de lluces de Beni García Bueno, ya interpretada por Carlos Dávila, Maria Antonella di Palma, Xuán Coll, Avelina Hernández, Claudio Vereterra y Lluis Antón González. “Al buen trabajo de la compañía, cabe añadir el cuidado capítulo del vestuario”, escribiría Juán Carlos Gea en La Nueva España, pues el grupu la trasladó la obra a los años 70, a plena transición española.

En 1999, estrénase “Una hora ensín Televisión” de Jaime Salom, con dirección y versión de Lluis Antón González. Una obra estrenada con gran ésitu, nel teatru Xovellanos. “Una hora ensín televisión” ye una actualización de “Casa de muñeques” de Ibsen, onde la crisi de la parexa, acaba nun portazu de la muyer, solo que nesti casu, acaba volviendo, pero dexando al final, un murniu mensaxe: de que “nada volverá a ser como enantes”. Según Francisco Diaz-Faes, criticu de La Nueva España, “Xuán Coll ha hecho una de las más grandes interpretaciones del teatro asturiano, con una réplica extraordinaria de Carmén Gloria”. Cosa na que coinciden tamién Joaquín Fuertes de El Comercio y F. Alonso Vega de la Nueva España. Pa Ramón Lluis Bande, del selmanariu Les Noticies, “El montaxe, Una hora ensín televisión de Telón de Fondo ye una obra dura ensín concesiones, una mirada amarga y violenta a la convivencia cotidiana”.

L´Ensalmador d´Antón de Marirreguera.

Nel añu 2000, coincidiendo col Día de les Lletres Asturianaes, qu´esi añu dediquen a Antón de Marirreguera, estrénase “L´Ensalmador”, primer obra de teatru conocía en llingua asturiana. El grupu fai una adaptación “L´Ensalmador” xuntando nuna sola trama, esta pieza, con les otres dos pieces recién recuperaes por Xulio Viejo, L´Alcalde y Los Alcaldes. Esta ye la primer vez que tenemos constancia que se punxera en pié esti clásicu de los clásicos asturianos. Dirixida por Xulio Vigil, con diseñu de lluces de Benigno García Bueno y interpretada por Xuán Coll, Isabel Friera, Quique Iglesias, Carmen Gloria García, José Luís Fernández, Claudio Vereterra y Lluis Antón González. Foi representada nos principales escenarios del País, El Campoamor d´Uviéu, El Xovellanos de Xixón, el Palacio Valdés d´Avilés y el teatru Prendes de Candás ente otros. Alfredo García Oliveros decía, en La Nueva España d´Aviles: “Senadores sin escrúpulos, alcaldes arbitrarios, mujeres rebajadas a su condición casi animal, ¡cuánta actualidad!”. Pa Adofo Camilo Diaz, l´estrenu de L´Ensalmador, “Trátase d´un auténticu motivu d´arguyu y preste pa tol qu´ame´l teatru y tenga dalgo vivío o dalgo lleío”. “Los asturianos sensibles tuvimos la oportunidá de venos, y sobremanera d´oyenos, talo cuualo yéramos va pa cuatrocientos años”. “La versión de Telón de Fondo, namás pué se calificada de modélica”. Francisco Diaz-Faes, críticu d´aquella en La Nueva España, nun artículu qu´entitulaba “Alcaldia y magia”, dicía: “El grupo gijonés aunó una ambientación que adorna de magia, por la iluminación, y sombras, el ciclorama, el vestuario, la caracterización y apariciones del ensalmador, como hechicero, y el populismo de un alcalde de tres al cuarto. En una combinación que recuerda a La Celestina, o el Lope de Rueda”.

Lluis Antón y José Luis en Antón, el cantu´l cisne

Nel añu 2004, coincidiendo col centenariu de la muerte d´Antón Paulovich Chéjov, el grupu fai, a modu d´homenaxe, una obra basada en testos del autor creador del teatru modernu, “Antón, el cantu´l cisne”. La obra trata d´un vieyu actor que fai un repasu de la so vida sobre los escenarios, repasando los sos principales papeles, col tramoyista del teatru como únicu espectador. Teatru dientro de teatru. José Luis Fernández y Lluis Antón González, protagonicen la obra dirixida por Xulio Vigil, con escenografía y lluces de Beni García.

Lluis Antón y Marilú en El Xuegu de Yalta.

Nel añu 2009, depués de varios intentos de facer una adaptación, d´un de los cuentos más guapos de la lliteratura universal “La dama del perrín”, d´Antón Chéjov, el grupu consigue los drechos pa representar una versión del escritor irlandés Brián Friel, entitulada “El xuegu de Yalta”. Dirixida por Sara García Rodríguez, con escenografía y diseñu de lluces de Beni García, y interpretada por Marilú Casas y Lluis Antón González. “El xuegu de Yalta” ye una guapa hestoria d´amor, d´amor adúlteru, onde realidá y ficción s´entemecen hasta nun saber diferenciales.

Nel 2011, por primer vez, el grupu reestrena una obra fecha con anterioridá, Squash, ya que la crisi, faciala ser de gran actualidá. Nesta ocasión tá interpretada Marilú Casas, Carmen Suarez Trapiello y Lluis Antón González, cola dirección de Sara García Rodríguez.

En 2013, col teatru Xovellanos llenu, estrénase la obra El tíu Antonin de Lluis Antón González, basada en “El tíu Vanya” d´Antón Chéjov. La historia situase a primeros del siglu XX, nel interior d´una casona asturiana, onde la vida monótona y aburría del campu, ye alteriada pola llegada d´un matrimoniu, el de los Arboleya, compuestu por un profesor, Alexandro y la so muyer Helena, muncho más moza qu´él. Cola dirección de Sara García Rodríguez, tá interpretada por Ángel Héctor Sánchez nel papel de Tíu Antonín, Carmen Suárez Trapiello, como Sonia, Marilú Casas, como Helena, José Luís Fernández, como Profesor Arboleya y Lluis Antón González como´l Doctor Lluna.

Inaciu Galán publicaba en Asturnews: “Una obra con una escelente adaptación d’El tíu Vania de Chèjov, fecha por Lluis Antón González, que non solo fai una adaptación llingüística, sinón que trai la hestoria a Asturies, con gran naturalidá y consiguiendo da-y al espectador una mayor cercanía cola historia”.

El grupu vién participando tamién, nestos más de cuarenta años, en foros, como los alcuentros de Llangréu, asociaciones como L´Asamblea Permanente de Teatru d´Asturies o la Unón d´Actores, Feteas, plataformes en defensa del Teatru Xovellanos de Xixón, el Capitol de Mieres o´l Arango de Xixón. Actos solidarios como los de la Marcha d´Acero, Huracán Mitch, el terremotu d´Haití….

Como grupu de cai participó en diversos desfiles y pasacais, como El Día D´Asturies y Antroxu de Xixón y espectáculos parateatrales como los del Día la Cultura, na carbayera Los Maizales.

Nestos más cuarenta años de defensa y normalización del teatru n´asturianu, el grupu sufrió, como´l restu del asturianismu, los ataques pol usu de la llingua, más p´allá del usu diglósicu y puramente festivu, que pa dalgunos tenia que tar arrequexada la llingua asturiana. José Monleón nel Diario 16 de Madrid dicía: “este asturianu suena a balbuceo idiomático, eficaz en el teatro cómico, pero no se si válido para expresar otro tipo de situaciones”. Pero los mayores ataques fueron dende Asturies. Un anónimu, que firma con F, con motivu del estrenu de Les Engañifes nel teatru de La Laboral escribía en El Comercio de Xixón: “Un texto que es una nadería. Una adaptación lunfárdica, que encima la llaman lengua asturiana, para insultar a los muchos asturianos que hablan algo completamente distinto, e incluso a los que usan vocablos aproximados colándoles otros que son pura invención esperantobablista”. Felix Caicoya en La Nueva España, calificaba al idioma como “el bableñol o bable académico”. Tamién en la Nueva España, edicción d´Aviles, Alfredo García Oliveros la calificaba de “experimentu teatral” y escribía: “El grupo Telón de Fondo escogió una obra de Jaime Salom, Una hora ensín televisión, localizada a cuatromil kilómetros del horreo más cercano, y la asturianizó, si eso es que se puede”. Tamién sufrió la marxinación y represión por nun contar la llingua con un status llegal comparable al restu de les llingües de estáu, por esti motivu el grupu nun pué participar en premios, certámenes y festivales reservaos a les llingües oficiales. También se-y prohibió el usu del asturianu en documentos oficiales como los estatutos del grupu, lo que lu llevó a sacar un comunicáu, na prensa, llamando represor al entós Delegáu del Gobiernu, Obdulio Fernández.

Por contra el públicu siempre apalaudió, y en munches ocasiones llenó los teatros onde se representaron les obres d´esti veteranu grupu. Aparte de les representaciones en Madrid, Lisboa, Lieja o Bruseles, les más númberoses fueron en Asturies, dende Tinamayor al Eo, poques fueron les localidaes y barrios que nun fueron visitaos. Grandes teatros como´l Campoamor o´l Filarmónica d´Uviéu; El Arango, La Laboral y el Xovellanos de Xixón; La Pista de la Exposición y El Palacio Valdés d´Avilés, pero tamién pequeños espacios de barrios, cases de cultura, asociaciones de vecinos, chigres, places y cais… vieron les actuaciones d´esti grupu fundáu hai más de cuatro décades.

Lluis Antón González.