Telón de Fondo en Colunga con "El tíu Antonín".

Telón de Fondo actuará en Colunga, cola obra "El tíu Antonín", el prósimu vienres dia 11 d´ochobre, na sala Loreto de la capital del conceyu.
"El tíu Antonín" ye una obra basada nel "Tiu Vanya" d´Antón Chéjov, escrita por Lluis Antón González. Dirixida por Sara G.R. y interpretada por Ángel Héctor Sánchez, Marilú Casas, Carmen Suarez Trapiello, José Luís Fernandez y Lluis Antón González, esta obra foi estrenada el pasáu mes de mayu nel teatru Xovellanos de Xixón, con notable ésitu de públicu y crítica.
Completen el equipu técnicu y artísticu, Xulio Vigil, encargáu de la produción y Alberto Ortiz y Beni  García que lleven les lluces.
"El tíu Antonín" ye una hestoria, d´amores y intereses cruzaos, d´enfotos por cambiar les coses, nuna época, la de primeros del sieglu XX, na que s´acolumbren grandes cambios sociales.
La hora comienzu será a les ocho la tarde.

Otru ésitu de públicu nel teatru Filarmónica.

El grupu teatru Telón de Fondo, representó la obra "El tíu Antonín", el pasáu 29 de septiembre, nel teatru Filarmónica d´Uviéu, con un notable ésitu de públicu, tal como ocurriere nel teatru Xovellanos de Xixón.
Nesti cuarenta aniversariu del grupu, a pesar de la crisis y les poques representaciones, estes tán siendo de gran ésitu d´espectadores.
La obra interpretada por Ángel Héctor Sánchez, Carmen Suárez Trapiello, José Luis Fernández, Marilú Casas y Lluis Antón González baxo la dirección de Sara G.R., trescurre na Asturies de primeros del sieglu XX y cunta la vida nel interior d´una casona asturiana, na que se crucen amores, intereses y unos deseos por cambiar la vida monótona y aburría del campu.
Les lluces, diseñu y execución, fueron de Alberto Ortiz y la producción de Xulio Vigil.