N´alcordanza d´Edward Albee.

Edward Albee

Esti pasáu vienres día 16 morrió en Montauk (Long Island, Nueva York) el dramaturgu Edward Albee. Tres vegaes ganador del prestixosu premiu Pulitzer, esti autor  d´un humor amargu y desgarraor, que transita munches vegaes pol camín del absurdu, ye´l creador d´obres tan importantes como Who's Afraid of Virginia Woolf? (Quién tarrez a Virginia Woolf), una radigrafía sobre les tempestuoses rellaciones de parexa, interpretada nel cine por Richard Burton y Elizabeth Taylor. Edward Albee tien una llarga vida d´ésitos pero tamién de fracasos, lo que lu fai un autor controvertíu. Formó parte de la xeneración d´autores tan importantes como Tennessee Williams, Arthur Miller y Eugene O´Neill.

 Ún de los sos caberos ésitos (2002) The Goat or Who Is Sylvia ( La cabra o ¿quién ye Sylvia) foi vista, en agostu del 2006, nel teatru Xovellanos de Xixón, interpretada por un maxistral José Maria Pou.

La so primer obra The Zoo Story (Hestoria del zoo) foi escrita en 1958, cuando l´autor tinía 30 años y nun pudo ser estrenada de mano en Nueva York, porque al productor paecia-y demasiáo europea, polo que foi estrenada en Alemania, aunque permaneció cuatro meses en cartel nel Off Broadway de Nueva York. A España tráxola William Layton en 1963 al Bellas Artes de Madrid, nuna sola función. Más tarde foi estrenada pol TEI de Magallanes ya interpretada Antonio Llopis y José Carlos Plaza. En 1991 el mesmu William Layton dirixe una nueva versión con Chema Muñoz y José Pedro Carrión como protagonistes. 

 

La versión n´asturianu d´Hestoria del zoo, foi fecha por Carlos Rubiera en 1989 y estrenada nel teatru Xovellanos de Xixón en ochobre de 1990 pol grupu teatru Telón de Fondo. Nun foi fácil conseguir los drechos pero al final consiguiéronse, polo que agradecemos a Albee el xestu de cedelos a esti modestu grupu asturianu. Dirixida por Rosabel Berrocal ya interpretada por Manuel Altares nel papel de Jerry y Lluis Antón González como Peter, con escenografía y diseñu de lluces de Beni García Bueno, que con tonos grises, dos bancos, unos andamios y gran arbolón con una rama seca conseguia una atmósfera apropiada pa la situación d´incomunicación de los personaxes. La obra cuntaba cola collaboración del músicu Argimiro Alvarez “Jimi” qu´abria y cerraba la obra  tocando´l saxofón. En xunu de 1991 foi vista, con gran ésitu de públicu, una de les caberes  representaciones de la obra, nel Teatru Campoamor d´Uviéu.

 

Telón de Fondo nel Arcu Atlánticu.

El grupu teatru Telón de Fondo acturá, el prósimu sábadu 30,cola obra Squash d´Ernesto Caballero, nel patiu del Centru Cultural Antiguu Istitutu Xovellanos de Xixón, dientro de la programación del Arcu Atlánticu 2016.
Squash ye una comedia social, interpretada por Carmen Suárez Trapiello, Marilú Casas y Lluis Antón González, baxo la dirección de Sara GR, la produción de Xulio Vigil y el diseñu de lluces de Alberto Ortíz. La hora comienzu será les 7:30 de la tarde, con entrada llibre hasta completar aforu.
https://www.youtube.com/watch?v=J-FL-SkowLE

Xuiciu y muerte d´una llingua.

“¡Qué vieyo too, cuántu prexuiciu, cuántu tópicu!” escribía va poco Xuán Xosé Sánchez Vicente nel so blog a cerca de la llingua. Y que cierto ye. Telón de Fondo grupu teatru de Xixón, lleva faciendo, modestamente, por normalizar al teatru n´asturianu más de 40 años. 40 años de discriminaciones, rocees y prexuicios que ya cansen. Resulta chocante que les meyores crítiques al grupu vinieren daes por medios d´afuera (Diario 16 y la revista Reseña de Madrid) cuando la compañía podia representar n´asturianu fuera d´Asturies. Agora ye prácticamente impensable. Y les peores, llenes de prexuicios p´hacia la llingua asturiana, fueren feches pos supuestos medios asturianos.

Da que pensar, esti papanatismu cultural provincianu (almiración por tolo que vien de fuera, aunque seya una puxarra) y despreciu de lo propio pol fechu de selo. Ye triste tener que demostrar cada día que l´usu d´una llingua nun tá reducíu a la chancia y la comedia. Y Telón baxará´l telón. La sentencia tá echada. La cicuta tá faciendo ya los sos efectos.

El xuegu de Yalta nel Xovellanos

El prósimu domingu día 20, TELÓN DE FONDO, pondrá n´escena, nel teatru Xovellanos de Xixón, una nueva versión d´El xuegu de Yalta, de Brian Friel; que ye una adaptación de La dama del perrín d´Antón Chéjov, fecha por el autor irlandés. Cuenta la hestoria d´Ana Sergueyevna y Dmitry Gurov, veraneantes en Yalta, y lo que de mano foi una simple aventura adúltera, dirá poco a poco complicándose. El relatu cuéntase en flashback, demientres los personaxes van cuntando la so propia hestoria, en forma de confesión directa al públicu.
La obra tá interpretada por Sara García Rodriguez, nel papel d´Ana Sergueyevna, Lluis Antón González nel de Dmitry Gurov, Ángel Héctor Sánchez que fai de camareru y xefe estación y Angélique Lopez Fueyo como vigulinista.
Les lluces tán feches por Alberto Ortíz, la produción ye de Xulio Vigil y la direción ye de Sara G.R.
La hora comienzu ye a les 20:30.
La obra cuenta con una ayuda del Ayuntamientu Xixón y la collaboración del Teatru Xovellanos, FETEAS, Teatru Kumen, La Capacha, Ricardo González y Hotel Asturias.

FELIZ Y PRÓSPERU AÑU NUEVU

Feliz añu 2016. Que l´añu entrante traiga lo meyor pal mundu la cultura y la creación artística asturiana.

El tíu Antonín nel Centru Municipal de Los Canapés d´Avilés.

El grupu teatru Telón de Fondo, representará la obra El tíu Antonín, nel Centru Municipal de Los Canapés d´Avilés, el prósimu llunes 23 de payares, a partir de les 7 la tarde.
La obra ye una versión asturiana de Tíu Vanya d´Antón P. Chéjov, una hestoria que cunta como telón de fondu les tresformaciones y conflictos de primeros de sieglu XX, ente la mina el desarrollu industrial y el campu, que se dan nesa época en Asturies, aunque´l verdaderu conflictu tá nel interior d´una casona asturiana, nel que la visita del profesor Alexandro y la so muyer Helena, trestocará los equilibrios de la vida cotidiana y monótona del mundu rural. Una hestoria d´amores ya intereses cruciaos onde la realidá opónse al deséu de los personaxes de llograr una vida meyor.

La obra tá interpretada por José Luís Fernández, como profesor Alexandro; Marilú Casas, como Helena; Ángel Héctor Sánchez, como Tíu Antonín, Carmen Suárez Trapiello, como Sonia y Lluis Antón González, como Doctor Lluna. La dirección ye de Sara García Rodríguez, les lluces diseñu d´Alberto Ortíz y la produción de Xulio Vigil.

Telón en L´Entregu con Squash, na II Muestra de Teatru Cómicu.

Telón de Fondo actuará el prósimu vienres 18 de septiembre nel Teatru Municipal de L´Entregu, cola obra Squash d´Ernesto Caballero, dientro de la II Muestra de Teatru Cómicu de Samartín del Rei Aurelio. La obra trata de dos muyeres que tán situación precaria (Trini prostituta col mozu na cárcel y Piedá, ama de casa y col maridu en paru) y que se presenten pa un puestu  trabayu, pa lo cualo tienen que superar una serie prebes. Trátase, fundamentalmente, d´una comedia social con un toque de reality show.
La obra tá dirixida por Sara Garcia Rodriguez, y interpretada por Carmen Suárez Trapiello, Marilú Casas y Lluis Antón González. Música y producción de Xulio Vigil.
La hora comienzu será les ocho la tarde.