Xuiciu y muerte d´una llingua.

“¡Qué vieyo too, cuántu prexuiciu, cuántu tópicu!” escribía va poco Xuán Xosé Sánchez Vicente nel so blog a cerca de la llingua. Y que cierto ye. Telón de Fondo grupu teatru de Xixón, lleva faciendo, modestamente, por normalizar al teatru n´asturianu más de 40 años. 40 años de discriminaciones, rocees y prexuicios que ya cansen. Resulta chocante que les meyores crítiques al grupu vinieren daes por medios d´afuera (Diario 16 y la revista Reseña de Madrid) cuando la compañía podia representar n´asturianu fuera d´Asturies. Agora ye prácticamente impensable. Y les peores, llenes de prexuicios p´hacia la llingua asturiana, fueren feches pos supuestos medios asturianos.

Da que pensar, esti papanatismu cultural provincianu (almiración por tolo que vien de fuera, aunque seya una puxarra) y despreciu de lo propio pol fechu de selo. Ye triste tener que demostrar cada día que l´usu d´una llingua nun tá reducíu a la chancia y la comedia. Y Telón baxará´l telón. La sentencia tá echada. La cicuta tá faciendo ya los sos efectos.

El xuegu de Yalta nel Xovellanos

El prósimu domingu día 20, TELÓN DE FONDO, pondrá n´escena, nel teatru Xovellanos de Xixón, una nueva versión d´El xuegu de Yalta, de Brian Friel; que ye una adaptación de La dama del perrín d´Antón Chéjov, fecha por el autor irlandés. Cuenta la hestoria d´Ana Sergueyevna y Dmitry Gurov, veraneantes en Yalta, y lo que de mano foi una simple aventura adúltera, dirá poco a poco complicándose. El relatu cuéntase en flashback, demientres los personaxes van cuntando la so propia hestoria, en forma de confesión directa al públicu.
La obra tá interpretada por Sara García Rodriguez, nel papel d´Ana Sergueyevna, Lluis Antón González nel de Dmitry Gurov, Ángel Héctor Sánchez que fai de camareru y xefe estación y Angélique Lopez Fueyo como vigulinista.
Les lluces tán feches por Alberto Ortíz, la produción ye de Xulio Vigil y la direción ye de Sara G.R.
La hora comienzu ye a les 20:30.
La obra cuenta con una ayuda del Ayuntamientu Xixón y la collaboración del Teatru Xovellanos, FETEAS, Teatru Kumen, La Capacha, Ricardo González y Hotel Asturias.

FELIZ Y PRÓSPERU AÑU NUEVU

Feliz añu 2016. Que l´añu entrante traiga lo meyor pal mundu la cultura y la creación artística asturiana.

El tíu Antonín nel Centru Municipal de Los Canapés d´Avilés.

El grupu teatru Telón de Fondo, representará la obra El tíu Antonín, nel Centru Municipal de Los Canapés d´Avilés, el prósimu llunes 23 de payares, a partir de les 7 la tarde.
La obra ye una versión asturiana de Tíu Vanya d´Antón P. Chéjov, una hestoria que cunta como telón de fondu les tresformaciones y conflictos de primeros de sieglu XX, ente la mina el desarrollu industrial y el campu, que se dan nesa época en Asturies, aunque´l verdaderu conflictu tá nel interior d´una casona asturiana, nel que la visita del profesor Alexandro y la so muyer Helena, trestocará los equilibrios de la vida cotidiana y monótona del mundu rural. Una hestoria d´amores ya intereses cruciaos onde la realidá opónse al deséu de los personaxes de llograr una vida meyor.

La obra tá interpretada por José Luís Fernández, como profesor Alexandro; Marilú Casas, como Helena; Ángel Héctor Sánchez, como Tíu Antonín, Carmen Suárez Trapiello, como Sonia y Lluis Antón González, como Doctor Lluna. La dirección ye de Sara García Rodríguez, les lluces diseñu d´Alberto Ortíz y la produción de Xulio Vigil.

Telón en L´Entregu con Squash, na II Muestra de Teatru Cómicu.

Telón de Fondo actuará el prósimu vienres 18 de septiembre nel Teatru Municipal de L´Entregu, cola obra Squash d´Ernesto Caballero, dientro de la II Muestra de Teatru Cómicu de Samartín del Rei Aurelio. La obra trata de dos muyeres que tán situación precaria (Trini prostituta col mozu na cárcel y Piedá, ama de casa y col maridu en paru) y que se presenten pa un puestu  trabayu, pa lo cualo tienen que superar una serie prebes. Trátase, fundamentalmente, d´una comedia social con un toque de reality show.
La obra tá dirixida por Sara Garcia Rodriguez, y interpretada por Carmen Suárez Trapiello, Marilú Casas y Lluis Antón González. Música y producción de Xulio Vigil.
La hora comienzu será les ocho la tarde.

Telón de Fondo nel Centru de Creación Escénica Carlos Álvarez-Novoa de la Felguera.14 y 15 de mayu.

El grupu teatru Telón de Fondo de Xixón actuará el xueves y vienres d´esta selmana na sala del Centru de Creación Escénica Carlos Álvarez-Novoa (C/Pintado Fe nº1)
de La Felguera, cola obra Squash d´Ernesto Caballero.
Interpretada por Carmen Suárez Trapiello, Marilú Casas y Lluis Antón González cola direción de Sara G.R, podemos dicir que“Squash” ye una obra de candente actualidá. Dos muyeres, una ama de casa y la otra prostituta enfréntense por un puestu de trabayu en plena crisis. Na llucha por conseguilu  muéstranos la parte más cruel y xavaz del ser humanu. Una comedia social con un toque de "reality show".
 La hora comienzu será a les ocho la tarde.
Trailer:  https://www.youtube.com/watch?v=J-FL-SkowLE

Monólogos en Nava

Güei, aprtir de les 12 la nueche tendrá llugar una representación de monólogos, na sidreria Prida de Nava.
Los encargaos d´echalos van ser los monologuistes Carlos Alba "Cellero" y Lluis Antón González que farán pasar a los clientes de la sidrería una nueche divertía y diferente.