Esti sábadu 2 d´ochobre, el grupu musical Tuenda, que dirixe Xosé Ambás, actuará nel auditoriu Principe Felipe d´Uvieu, dientro de los actos conmemorativos del 25 Aniversariu del PAS. Entemedies del conciertu el actor y monologuista Lluis Antón echará tamién un monólogu. La hora comienzu ye les 8 la tardi y la entrada ye llibre.
Los monologuistes Carlos Alba, Silvino Torre y Lluis Antón, actuarán nes Fiestes de San Matéu d´Uviéu na localidá de La Corredoria, dientro de la programación festiva qu´esti añu s´entama nos barrios de la ciudá, col so espectáculu TRES PATES PA UN BANCU. La actuación será el vienres 17 de septiembre y la hora de comienzu ye les 9 la nueche na plaza del Conceyín, onde tán situaos los chiringuitos y demás atraciones.
La selmana que vien entama, en tierres de castiella,el rodaxe del curtiu, "La mujer del hatillo gris", dirixíu por Luis Trapiello. Maria Botto,Alex Angulo, Celso Bugallo, Lluis Antón, Manolo Cuervo, Lucas Trapaza, Eladio Sanchez, Antonio Castro, Eduardo Antuña, Rosa Moreno, Luis Muñiz,Enrique Villanueva y Manuel Pizarro son parte del repartu d´una hestoria que trescurre na posguerra española.
El prósimu 7 d´agostu (sábadu) el grupu teatru TELON DE FONDO actuará, cola obra "El xuegu de Yalta", nel Teatru Toreno de Cangas del Narcea. La obra dirixida por Sara García Rodriguez, ye una adaptación del cuentu de Chéjov "La dama del perrín" fecha por dramaturgu irlandés Brian Friel, y traducida por Lluis Antón González. Nella cuenta la hestoria d´un amor adúlteru, ente Ana Sergeyevna y Dmitry Guróv nun veranu fatal en Yalta, y lo qu´escomienza como un xuegu, acabará atrapando a los sos protagonistes como nun remolín. La obra tá interpretada por Marilú Casas, nel papel d´Ana y Lluis Antón González como Gurov. Completen l´equipu técnicu y artísticu Beni García, Alberto Ortiz y Xulio Vigil. Entama Cajastur.
Esti martes 22 de xunu, dende les 11 la mañana, grabaránse nuevos monólogos pal programa AL ALDU de la TPA, na Casa la Cultura de Llaviana. Pin de la Cotolla, Min de les Pieces, Silvino Torre, Nona de Calaín, Cellero y Tante serán los encargaos de facenos riír con esti xéneru tan asturianu como ye´l monólogu. La entrada ye llibre.
El grupu teatru TELON DE FONDO actuará nel Nuevu Teatru de La Felguera (Llangréu) el prósimu vienres día 11, cola obra "El xuegu de Yalta" de Brian Friel, adaptación del cuentu de Chéjov "La dama del perrín". La hora comienzu de la representación ye a les 8:15 de la tarde. La obra cuenta una de les mas guapes hestories d´amor, escrita pol autor rusu y adaptada por dramaturgu irlandés Brian Friel, que Telón de Fondo pon n´escena baxo la direción de Sara García Rodriguez. El repartu componénlu Marilú Casas y Lluis Antón González. La escenografía y les lluces son de Beni García, hestóricu director del grupu avilesín Candilejas y la producción ye de Xulio Vigil un de los fundadores de Telón de Fondo nel añu 1973.
El prósimu día 24 de mayu grabaránse nuevos monólogos na Casa la Cultura de Llaviana, pal programa AL ALDU de la TPA. La hora comienzu ye a les 11 la mañana y la entrada ye llibre.
