LA RISIÓN

La Risión foi una seición selmanal de monólogos, que formaba parte del programa Al Aldu de la TPA. Foi un programa modestu, que pretendía, ente otres coses, revitalizar el monólogu asturianu y que s´emitía en horariu matinal.

El monólogu cunta con una llarga tradición n´Asturies y algamó gran popularidá nos años sesenta y setenta del pasáu sieglu, gracies a la difusión que supunso, en primer llugar la so grabación en discos de vinilo, y lluego en cintes cassettes, que permitien por primer vez lo que güei nomamos “copia pirata”, anque en menor media, pos l´esfuerzu y coste de la copia analóxica yera mayor que lo ye la dixital. Pandiella, foi nesa época´l más popular de los monologuistes, qu´actuaben en fiestas y romeries, casi siempre acompañaos pola canción asturiana.

Cola llegada de la democracia, les nueves corrientes creatives y revindicatives de la lliteratura asturiana (El Surdimientu), non solo nun cultiven esti xéneru, sinon que refuguen dél, pola so significancia consevadora, y por rellacionar a l´asturianu solo col humor y con colos estereotipos de monologuista borrachu, machista, escatolóxicu…

Sólo Rubén Sánchez  Vicente, nos años 80, y depués Dolfu Camilo nos 90, acercaríense a esti xéneru pa tratar de revitalizálu y actualizálu, manteniendo´l versu del monólogu tradicional.

Antón García, foi´l primer editor, a primeros d´esti sieglu, qu´apostó fuerte pola edición de monólogos asturianos cola coleición “Maestros del humor”, con una guapa edicción en tapa dura. Trató superar la barrera, que suponia la publicación n´asturianu, arrequexada na llibreria, y buscó un públicu más ampliu y popular, faciendo una distribución importante nos kioscos de prensa d´Asturies.

Nel 2005 Inaciu Galán, cola asociación H.a Xareos, entama na sala Albeniz de Xixón el I Certame de Monólogu Modernu cola pretensión de modernizar el monólogu asturianu, con nuevos textos que ya nun son, n´esta ocasión, necesariamente en versu. Esto xenera un pequeñu alderique, ente la corriente tradicional del monólogu asturianu y el monólogu modernu más averáu al “stand-up comedy”.

Nel 2007, encárgame Antón García, la coordinación de la seición de monólgos La Risión del programa Al Aldu, que va emitise dientro del magazine matinal “Con dos de azucar”. La mio llabor de coordinación, ye n´esti momentu, la de buscar textos y actores intérpretes pa poder grabar un monólogu nuevu cada selmana.

Los autores

Dende xunu de 2007 avientu de 2009, que coordine esti programa emitiéronse 141 monologos diferentes, la mayoria, hasta esi momentu, inéditos y escritos a costa fecha pal programa, de los cuales el 38 % foron escritos por muyeres, lo que representa un cambiu importante nesti xéneru mayoritariamente masculín. Cristina Muñiz foi, con 43  l´autora con más monólogos emitios, seguia por Carlos Alba (32), Tante Blanco (21), Luzdivino Diaz González (12) y Vanessa Peña (9). Grabáronse tamién monólogos clásicos d´autores como León Delestal, Anxelu, Rubén Sánchez o Pin el Cuetu. Autores asturianos d´otros xéneros como José Luis Piquero, Inaciu Galán, Sixto Cortina, Alberto Suarez, Chechu García… tamién escribieron dalgunos de los monólogos. Tamién, por primer vez, emitiéronse monólogos en gallego-asturiano.

Los actores monologuistes

Los actores  monologuistes que participaron nestos dos años y mediu foron 23, de los que´l 48 % foron muyeres, anque la presencia masculina foi mayor pol númberu de monólogos grabaos, la presencia femenina tamién representa un saltu cuantitativu. Carlos Alba (33), Tante Blanco (21), Silvino Torre (17) foron los que más participaron. Amás de los actores ya especializaos en monólogu asturianu como Carlos Alba Cellero, Pin de la Cotolla, El Maestru, Luz Mari del Sol o Min de les Pieces, incorporáronse un bon númberu d´actores de la escena asturiana como Silvino Torre, Begoña Quirós, Carmen Sandoval, Isabel Friera, Izar Gayo, Carmen Gloria García, José Maria Prieto, Marilú Casas, Martina Bueno, Sara García, Toño Caamaño, Xuán Coll….

Audiencia

Anque estos datos son poco fiables (sonlo en xeneral tolos datos que TNS da p´Asturies, polos pocos audímetros  que tien) na banda de pola mañana sonlo entá más, pola poca audiencia en xeneral de les televisiones. Tamién la curtia duración del programa (diez minutos) ye un datu que xuega a la contra pa poder dar una valoración  más esauta. Estos datos son recoyios de Fórmula TV nel primer trimestre de 2009, dannos una muestra de la volatilidá de los datos que van dende´l 13 al 0 % d´audiencia. Asina fice´l paletu (13,00 %), Viaxes llargos (10,00 %), Tópicos asturianos (7,70 %) Animador sociocultural (7,40 %), Xuegos traumáticos (7,20 %), Test ¿mozu o carroza? (7,00 %) foron los monólogos qu´algamaron les principales cuotes de pantalla. El total del promediu, nel horariu matinal (del que disponemos datos) foi de 3087 espectadores por programa y un 4,42 % d´audiencia, la cual pienso que nun fuera mui diferente al restu de los programes de la cadena nesa banda horaria.

Dalgunos de los monólogos foron colgaos en You Tube y la so popularidá como tolo d´internet, tien poco que ver, en dellos casos, cola calidá, pero nun dexa de ser un datu más de la visibilidá del programa. “Ser asturianu”, monólogu de Cristina Muñiz ya interpretáu por Silvino Torre con más de 46000 visites, 25 comentarios, y 79 valoraciones yel más popular de toos, seguiu por “Independencia” de Cristina Muñiz ya interpretáu por Begoña Quirós, con cuasi 20000 visites, 66 valoraciones y 20 comentarios. El promediu de los monólogos colgaos ye de  de unes 9000 visites con una valoración media de 4,8 sobre 5.

Difusión

El programa revitalizó la edicción de monólogos asturianos, qu´amás de los ya editaos previamente de “Cotollaes” de Luzdivino Diaz González (Pin de la Cotolla) y “Del chigre” de Carlos Alba (Cellero), editáronse tres nuevos llibros , “Que vos preste” de Cristina Muñiz, “Pa echar unes rises”, de varios autores y “Otros monólogos pa echar unes rises”, tamién de varios autores.

A cuenta del programa na tv, creóse un pequeñu circuitu alternativu de monólogos en chigres y cafeteries, que la crisi eliminó cuasi por completo. Candás, Xixón, Llugones, Avilés, La Corredoria, La Pola L.lena, La Felguera… foron dalgunos de los sitios nos que llogróse llevar estes actuaciones.

Pa finar, pienso que seria bono, un mayor apoyu, dende les instituciones, al monólogu asturianu, formando nuevos monologuistes (na ESAD o otres escueles municipales) y creando nuevos concursos, como el Pepe Campo de  Morea.  Difusión na TPA, nun horariu más afayaizu, a ser posible grabáu con públicu y con una total llibertá de los creadores, un programa de monólogos, monográficu o formando parte d´otru más variáu, pero sobre too, el reconocimientu del monologuista, como ún de elementos fundamentales del nuestru teatru popular.

Lluis Antón González.