Feliz añu 2018

Nel añu 1973 creábase el grupu teatru TELÓN DE FONDO, como grupu d´empresa de l´antigua ENSIDESA. Güei depués de 45 años de continua actividá, queremos dar por finada la nuesa trayectoria como grupu teatru. Nel llibru "Una maleta enllena recortes" qu´asoleyaremos nel 2018, recoyeremos parte de la nuesa llarga hestoria. Un abegosu camín de lluches y trabayu pola normalización del teatru n´asturianu. Tenemos qu´agardecer a les casi cien persones que nestos 45 años participaron de dalguna manera d´esti proyectu. A los programadores, a les instituciones, a los teatreros y al públicu que nos acompañó nesti camín.Gracies.

Xuán Coll

Miembru fundador del grupu de teatru d´ENSIDESA Xixón. Foi presidente, secretariu y ayalgueru de l´asociación TELÓN DE FONDO Grupu Teatru. Participó en tolos espectáculos de cai y animaciones parateatrales. Como actor en Conduciré mi pueblo a través del desierto, Cristobal Colón, Escorial, Garulla, Les engañifes, La confesión, Mayestrix escontra Cuasimodo, Equí nun paga nadie, Una hora ensin televisión y L´Ensalmador. Trabayó en delles películes y cortos rodaos n´Asturies y en compañies profesionales como Toaletta, Casona y Margen.

Xulio Vigil

Miembru fundador del grupu TELÓN DE FONDO, foi Coordinador, Presidente, Secretariu y Ayalgueru de l´asociación creada nel añu 1973 como Grupu d´Empresa d´ENSIDESA. Participó activamente na creación de L´Asamblea Permanente de Teatru d´Asturies.Tamién participó en toles obres y espectáculos de cai dende l´entamu. Como actor en Escorial, Fantasia de amor y muerte, Conduciré mi pueblo a través del desierto, Cristobal Colón, El león enamorado, Asamblea general, Canto del fantoche lusitano, El siglo de oro, El triquimundiu, El mas extraño idilio, Garulla, Miel, pastel y un muñecu de papel, y D´animales bancos y lladrones. Como técnicu y diseñador del soníu en La Confesión, Mayestrix escontra Cuasimodo, Squash, Una hora ensín televisión, L´Ensalmador y Antón el cantu´l cisne. Como director n´Antón el cantu´l cisne y L´Ensalmador, como productor n´El tíu Antonín y El xuegu de Yalta.

El Tíu Antonín nel Teatru Clarín de Soto´l Barcu.

El prósimu 31 de marzu, el grupu teatru Telón de Fondo, representará la obra El tíu Antonín, nel teatru Clarín de Soto´l Barcu. La obra, que ye una versión del Tíu Vania de Chéjov fecha por Lluis Antón González, tá dirixida por Sara G.R. con lluces de Alberto Ortiz y produción de Xulio Vigil.
Nuna casona asturiana, nos años 30 del sieglu XX, la vida tranquila del campu vese alteriada pola visita d´un vieyu profesor acompañau pola so esposa. Nuna atmosfera veraniega, les rellaciones d´amores cruciaos de los habitantes de la casa desatará un tormenta que llevará a una situación tán dramática que por momentos fai entever la traxedia.
La obra tá interpretada, nesta ocasión, por Ángel Héctor Sánchez, nel papel de Tíu Antonín; Jose Luis Fernández como Profesor Arboleya; Carmen Suarez Trapiello como Sonia; Sara García Rodriguez como Helena y Lluis Antón González como Doctor Lluna. La función qu´entama a les 8 la tarde,va ser, posiblemente, la última oportunidá de ver esta obra representada pola compañia decana del teatru asturianu.
Ver trailer:
 https://www.youtube.com/watch?v=p5OSwcaQjvM

Feliz añu 2017

Nel 2017 cúmplense 44 años del nacimientu de Telón de Fondo. Un tiempu razonable pa repensar el futuru. Feliz 2017 a to@s.

Telón de Fondo nel teatru Prendes de Candás.

El grupu teatru TELÓN DE FONDO de Xixón, representará´l prósimu vienres 28 d´ochobre la obra SQUASH d´Ernesto Caballero, nel teatru Prendes de Candás. La obra, aunque foi escrita hai más de 20 años, ye de candente actualidá, pola situación de la crisis económica. Dos muyeres, Trini y Piedá veránse obligaes a presentase, por necesidá, pa un puestu de trabayu qu´un supuestu empresariu-yos ufierta. Les prebes ente les que tá una partía de squash, fará que les dos muyeres s´enfrenten a distintes situaciones, que por un momentu recuerden a un "reality show" televisivu. La obra tá interpretada por Marilú Casas, como Trini; Carmen Suarez Trapiello, como Piedá y Lluis Antón González como Ladio. la dirección ye de Sara G.R., les lluces de Alberto Ortíz y la producción de Xulio Vigil.
Esta será la cabera representación d´esta obra por esta temporada, asina que ye una bona oportunidá pa la xente que tovía nun la vió.
La hora de comienzu ye a le 9 de la tarde.

https://www.youtube.com/watch?v=J-FL-SkowLE

El xuegu de Yalta nel Valey de Piedrasblancas.

El prósimu día 22 d´ochobre, a partir de les 20:00 hores, el grupu teatru Telón de Fondo de Xixón, pondrá n´escena la obra El xuegu de Yalta de Brian Friel, basada nel cuentu llargu d´Antón Chéjov, La dama del perrín. Esta será la cabera representación d´esta obra, polo menos por esta temporada, asina que los que ten interesaos en vela tienen una oportunidá única.
El xuegu de Yalta ye un xuegu dramáticu nel que los protagonistes xueguen cola ficción y la realidá costantemente. El encuentru ente Dmitry Gurov y Ana Sergueyevna na ciudá de veranéu de Yalta, ye l´entamu d´un conflictu, non resueltu, nel que los protagonistes veran alteraes les sos vides al escomenzar una rellación adúltera.
La obra tá escrita pol autor irlandés de Philadelphia, Here I Come! (1964) Faith Healer (1979)
Translations (1980) Dancing at Lughnasa (1990) na so etapa mas tardía y ye una adaptación fiel del cuentu de Chéjov, La dama del Perrín,  el consideráu un de los meyores cuentos de la lliteratura universal.
La obra tá interpretada por Sara García Rodriguez, como Ana y Lluis Antón González, como Gurov y acompañaos pol vigulín d´Angelique Lopez Fueyo que pondrá la música y efectos directos. Les lluces tarán daes pol veteranu illuminador, y director del míticu grupu avilesín Candilejas,  Beni García Bueno, con diseñu d´espaciu escénicu d´Alberto Ortíz.  La produción ye de Xulio Vigil, fundador del grupu nel añu 1973 y la dirección cuerre  a cargu de Sara G.R.